Os establecementos comerciais de Narón sortean agasallos a través do programa «Anima Rúa»

Preto dun centenar de establecementos comerciais da cidade de Narón continúan sorteando agasallos a través do programa Anima Rúa, organizado polo Concello de Narón en colaboración coa Asociación de Comerciantes de Narón.

Dende o pasado luns e ata este venres, día 26 de maio, entregarán cada día 90 paraugas, un por establecemento adherido á ACN, entre as persoas que realicen as súas compras nestes locais, debidamente identificados.

A maiores, con esas rifas, a clientela terá a oportunidade de participar no sorteo de catro vales de experiencias valorados en 250 euros cada un que se sortearán este sábado, día 28, no acto central deste programa, que se desenvolverá a partir das 12.00 horas na praza da Gándara, tal e como recordou o edil de Promoción Económica, David Pita.

A proposta enmárcase na campaña municipal “Merca en Narón. Facemos cidade” e inclúe ó longo da mañá e tarde do sábado varias exhibicións de baile, patinaxe, musicais, concertos e contacontos, dirixidos a persoas de todas as idades.

Ás 12.00 e ás 13.15 horas alumnado das academias de baile All Dance e CompArte realizará exhibicións e ás 13.45 comezará o concerto de Ainai (tributo a Bob Marley), para continuar ás 14.15 cun concerto de Isma Taboada.

A música seguirá pola tarde, ás 15.00 horas co contacontos musicado de Música Miúda, e ás 15.45 horas con RockSchool. Ás 17.15 horas terá lugar unha exhibición do club de patinaxe CPAX Eiriz e ás 17.45 outra da academia de música 2Plicas.

O sorteo dos vales de experiencias, tres, debido a que un se entregará a través das redes sociais, será ás 18.45 horas. As persoas que desexen consultar toda a información poden facelo a través da web: www.comerciodenaron.com

Lea también

Sés, Xacarandaina e un musical dos anos 80 e 90 esta fin de semana no Pazo da Cultura, en Narón

O Pazo da Cultura de Narón acollerá esta fin de semana tres novos espectáculos da …