O concello de Ferrol abre o prazo de inscrición para actividades extraescolares «Artellando»

A Concellería de Educación, que dirixe a edil Susana Martínez Galdós, abrirá  este mércores, e ata o 10 de outubro inclusive, o prazo de inscrición para participar no programa de actividades extraescolares “Artellando”, dirixido ao alumnado de Educación Primaria dos centros de ensino públicos e concertados de Ferrol. Así, as solicitudes deben presentarse no Rexistro Xeral do Concello de Ferrol, en horario de 09.00 a 14.00, de luns a venres, e de 09.00 a 13.00 os sábados.

A edil Susana Martínez Galdós destacou o incremento de actividades respecto ao pasado curso escolar -nesta ocasión serán sete- e a incorporación de novos obradoiros -cociña fría, percusión baseada principalmente en instrumentos galegos, ximnasia rítmica e baile moderno-. A estes súmanse tamén fotografía con tratamento informática, encadernación e reciclaxe de libros e artes plásticas (manualidades con material de refugallo). En total, sete actividades que se celebrarán en diversos espazos -Casa da Xuventude, Biblioteca Municipal da Praza de España, rúas de Ferrol e un CEIP do municipio, pendente de confirmar-.

Todas estas actividades serán gratuítas, tal e como subliñou a concelleira de Educación, quen indicou que poderán participar nesta convocatoria todo o alumnado matriculado nos centros de ensino de Ferrol, tanto públicos como concertados, que se atopen cursando actualmente entre 1º e 6º de Educación Primaria. Así mesmo, avanzou que se desenvolverán os venres de outubro, novembro e decembro, sendo a duración total de cada obradoiro de 9 horas.

Por orde de inscrición

A selección de participantes será mediante rigurosa orde de presentación das solicitudes e o número máximo por obradoiro será de 24.  As listas provisionais de admitidos e de excluídos publicaranse o vindeiro 15 de outubro no taboleiro de editos do Concello de Ferrol e na páxina web da Concellería de Educación. Posteriormente, entre os días 17 e 18 de outubro os admitidos para participar neste programa educativo municipal deberán confirmar a súa praza mediante a presentación no Negociado de Educación do Concello da folla de confirmación.

As actividades, cos lugares nos que se levarán a cabo, son as seguintes: