A Mancomunidade aproba os orzamentos para 2013

O alcalde de Ferrol, José Manuel Rey Varela, presidiu onte o pleno ordinario da Mancomunidade de Concellos da Comarca de Ferrol no que se aprobou inicialmente o presuposto xeral co que contará esta entidade o vindeiro ano de 2013, que ascende a un total de 407.503,92 euros. Esta cifra supón un descenso de algo máis de 100.000 euros con respecto ao documento económico do presente exercicio, o primeiro da nova etapa de Rey Valera ao fronte do organismo supramunicipa, e que o cal multiplicaba por cinco o orzamento da anualidade de 2010, que ascendía unicamente a 103.700 euros.

O presidente da Mancomunidade valorou de forma positiva o feito de que a entidade cumpra cos prazos establecidos para aprobar as súas contas, o que cualificou como «unha mostra de normalidade, estabilidade e vontade de entendemento» entre os rexedores que integran este organismo formado polos concellos do entorno da ría e ao que recentemente se incorporou o de Cabanas. Rey Varela sinalou tamén que o texto contable de 2013 responde á complexa situación económica actual, á que non son alleas as administracións públicas, mantén a vinculación adecuada entre gasto e ingresos orzamentarios e cumpre coas esixencias que marca a lei de estabilidade orzamentaria. Unha vez que os presupostos de 2013 foron hoxe aprobados de maneira inicial polo Pleno da Mancomunidade, o seguinte paso é sometelos a exposición pública para a presentación de alegacións antes de que volvan ao pleno de alcaldes para a súa aprobación definitiva.

E ao fío desta aposta por unir esforzos para mellorar a atención e o servizo ao cidadán, o presidente da Mancomunidade avanzou que se fará un estudo territorial sobre a situación en materia de igualdade entre homes e mulleres. Este informe servirá de punto de partida de cara a artellar programas, actividades e servizos común dirixidos á muller. O estudo se  executará grazas a unha subvención de 3.800 euros concedida pola Deputación Provincial da Coruña.