En marcha o VIII Salón Profesional de Viños de España en FIMO

O secretario xeral de Medio Rural e Montes da Xunta de Galicia, o presidente da deputación provincial, o alcalde de Ferrol e a presidenta da Cámara de Comercio, inauguraron  o VIII Salón Profesional de Viños de España (Fevino), que se celebra nas instalacións do recinto feiral de Punta Arnela (FIMO).

Tras percorrer os expositores cos bodegueiros que participan nesta feira, o primeiro edil da cidade fixo entrega do Premio a unha Traxectoria Profesional a Víctor Pascual Artacho, presidente do Consello Regulador da Denominación de Orixe La Rioja e da Organización Interprofesional do Viño de La Rioja.

«Fevino convertirá a Ferrol nunha cidade de refrencia»(alcalde de Ferrol) 

Na súa intervención manifestou o seu convencemento de que “FEVINO converterá de novo a nosa cidade, nunha cidade de referencia para os profesionais e amantes do viño, que é moito máis que un produto de consumo”. Ao respecto, sinalou que o viño e o que xira ao seu redor constitúen “un sector económico fundamental para o noso país, tamén en Galicia, por non falar de toda a cultura, tradición e valor medioambiental que está ligado a esta actividade”.

Así, o rexedor ferrolán apuntou que o feito da presenza durante os próximos tres días en Ferrol de máis de 200 bodegueiros e dos mellores especialistas do mundo vitivinícola “servirá para relanzar aínda máis un sector que hoxe en día xa é moi importante para a nosa economía e, a través do cal, Galicia e España teñen unha importante proxección internacional grazas á excelencia dos seus viños”, dixo.

 «Fevino é un escaparate  excelente para abrir mercados» (Tomás Fernández-Couto)

Pola súa parte o secretario xeral de Medio Rural e Montes, Tomás Fernández-Couto, salientou que Fevino se converteu nun escaparate excelente para abrir mercados no noroeste peninsular, redundando en beneficio dos viños en xeral e dos galegos en particular.

Fernández-Couto cualificou este certame de referencia enolóxica, onde o consumidor pode coñecer de primeira man todas as particularidades dos viños de cada unha das rexións españolas sen ten que desprazarse, simplemente a través dos sentidos. Pois nesta feira, engadiu, atópase o mellor, o máis selecto dos produtos enolóxicos que conxugan tradición e calidade.

O secretario xeral tivo palabras para a viticultura galega, un dos sectores produtivos de maior transcendencia para a nosa Comunidade, non só dende o punto de vista económico senón tamén polas súas grandes implicacións sociais, histórico-culturais, medioambientais e paisaxísticas que fan da viticultura un sector estratéxico e representativo para Galicia.

«Chegou o momento de traballar pola verdadeira esencia deste recinto» (Diego Calvo)

O presidente da deputación da Coruña, Diego Calvo, durante a súa intervención, asegurou “estar moi satisfeito” de ver como se abre unha nova edición da feira, á que cualificou como “a máis importante de todas as que tivo Fevino”. “Esta edición é fundamental, e non porque siga sumando anos, senón porque a situación pola que atravesa este recinto fixo perigar a súa celebración. Este ano fomos capaces de superar os problemas e fixémolo entre todos”, asegurou o mandatario provincial.

Calvo lembrou que a Deputación da Coruña se involucrou con Fevino e con FIMO, aos que brindou a súa axuda e apoio para futuras edicións. “Iso si, esixiremos resultados”, matizou o presidente.

“Chegou o momento de seguir traballando na verdadeira esencia deste recinto”, asegurou o presidente, quen lembrou que en Fevino danse cita expositores cos mellores caldos galegos, españois e, por primeira vez este ano, internacionais.

Calvo aplaudiu tamén o obxectivo da feira, que non é outro que “reunir a todos os profesionais do sector para crear novas oportunidades de negocio”, para asegurar a continuación que “non hai mellor lugar para celebrar este encontro que Ferrol, onde somos consumidores de bos viños e onde nosa hostalería aprecia e coida este sector”.

Para terminar, Calvo expresou o seu desexo de que “en dous anos sexan máis de 150 expositores os que elixan Fevino para seguir crecendo no sector e que esta cidade se converta en todo un referente para o sector

FEVINO

A Feira do Viño do Noroeste conta coa presenza dos mellores profesionais e especialistas do sector con representantes de adegas, distribuidores, enólogos e sumilleres, importadores e consellos reguladores, entre outros.

En Fevino 2013 danse cita máis de medio centenar de expositores directos, con miles de referencias e adegas representadas e con máis de 6.000 visitantes. O progresivo incremento da superficie de exposición, de edición en edición, é reflexo evidente tamén da evolución favorable do certame.