O BNG pide ao goberno local traballos de mellora no pavillón polideportivo de Santa Mariña

O Bloque Nacionalista Galego de Ferrol esixiu na mañá deste martes, día 25, ao goberno local que desenvolva traballos de mellora e adecentamento no pavillón polideportivo de Santa Mariña que palien as deficiencias do mesmo e lembran que se trata dunha instalación que conta cunha alta ocupación.

Para o BNG resulta importante que se atendan as necesidades deste e doutros pavillóns deportivos da cidade que presentan desperfectos pola falta de mantemento que redundan negativamente na calidade das actividades que se desenvolven nos mesmos.

Concretamente O BNG solicita que se proceda a revisar os quentadores de auga desta instalación xa que comezan a resultar insuficiente para os usuarios que fan uso dos mesmos. Así mesmo desde o BNG advirten que cumpre revisar e substituuir as vidrieiras do mesmo que nalgúns casos se atopan estaladas así como proceder à limpeza dos canos que provoca en ocasións que entre o auga da choiva dentro do pavillón así como tapar as pingueiras existentes.

Desde o BNG queren, tamén, instar ao goberno de Rey Varela a que lle preste maior atención a esta zona da cidade e mesmo que procedan a limpar e desbrozar a contorna deste pavillón de Santa Mariña para retirar a maleza e silvas existentes.